Sunday, January 9, 2011
தொடர்வண்டிப் பயணம்
வெண்ணிலவு வீடு திரும்ப
கதிரவன் கண்விழிக்கும்
சாயல் படர...
விடிந்தும் விடியாமலும்
இருந்த அந்தக்
காலைப் பொழுதில்
முத்துமுத்தாய்ப் படர்ந்த
பனித்துளிகளில் நனைந்த
வயல்வெளிகளும்...
விறைத்து நிற்கும்
காவலர்களைப்போல்
இருபுறமும் அணிவகுத்து
நிற்கும் மரங்களும்...
மீனவன் வலையில்
அகப்படாது பிழைக்க
இங்கும் அங்கும் நீந்தும்
உயிர் போராட்டத்தை
தன்னுள் மறைத்து
அமைதியையே ஒலமிடும்
நீரோடைகளும்...
கதிரவனின் பார்வை பட்டு
மொட்டவிழ காத்து நிற்கும்
தாமரைகள் நிரைந்த
தடாகங்களும்...
குஞ்சுகளைக் கூட்டில் விட்டு
நீர்நிலைகளை நாடி
கூட்டங்கூட்டமாய் பறக்கும்
பறவைகளும்...
மேகங்களுடன் ரகசியம் பேசும்
உயர்ந்த மலைகளுமாக...
மெல்லியதாய் ஒளிபடர்ந்து
சிலுசிலிர்த்து வீசும் காற்றை
சீறி ஊடுருவும்
தொடர் வண்டியின்
இதமான தாலாட்டில்
பயணித்தேன்...!
அந்தக் காலைப்பொழுதில்
ஒன்றன்பின் ஒன்றாக
இக்காட்சிகளை ரசித்தபடியே...
தொடர்வண்டியிலே
தொடருது என் பயணம்...!
- பிரதீபா புதுச்சேரி (bradipagen@yahoo.co.in)
#நன்றி
முத்துக்கமலம் இணைய இதழ்(http://www.muthukamalam.com/muthukamalam_kavithai317.htm)
பதிவுகள் இணைய இதழ்(http://www.geotamil.com/pathivukal/poems_september2009.htm)
Saturday, January 8, 2011
தேடல்
தேடல்
என் கண்களுக்கு மட்டும் அல்ல
உன் கால் தடம் தேடும்
என் பாதங்களுக்கும் தான்...
- பிரதீபா புதுச்சேரி (bradipagen@yahoo.co.in)
#நன்றி
வார்ப்பு இணைய இதழ்(http://www.vaarppu.com/view/1832/)
விழிச்சிறை
உன் தூண்டில் பார்வையில்
என்னை சிக்க வைத்தாய்
குற்றமென்று
என் விழிச் சிறையில்
உன்னை சிறை வைத்தேன்
சிறை உன்னை
மாயக் கள்வன் ஆக்கியதோ!!!
சிறையில் இருந்தபடியே
கைப்பற்றி விட்டாயே
என் இதய சிம்மாசனத்தை!...
- பிரதீபா புதுச்சேரி (bradipagen@yahoo.co.in)
#நன்றி
வார்ப்பு இணைய இதழ்(http://www.vaarppu.com/view/1793/)
நட்சத்திரம்
வான வீதியில் பகலெல்லாம்
மேகங்களுக்கு இடையே
தென்றலுடன்
துள்ளி குதித்தாடிய
வான் மகள்
உலாவிய இடத்தில் இருந்து
வழித் தவறாதிருக்க
அவள் ஆடையிலிருந்து
சிதறிய முத்துக்கள்
இரவில் அவளுக்கு வழிகாட்டும்
நட்சத்திரங்களாய் மின்னுகின்றனவோ....
- பிரதீபா புதுச்சேரி (bradipagen@yahoo.co.in)
#நன்றி
வார்ப்பு இணைய இதழ்(http://www.vaarppu.com/view/1793/)
நிழல்
பிறந்தது முதல்
மண்ணில் புதையுரும் வரை
என்னுடன் இருப்பது
நீ மட்டுமே
ஒளியின் பிரகாசத்தில்
என் பின் மறைந்து
இருளின் குளுமையில்
அதனுடன் ஒன்றாகி கலந்து
கதிரவன் தோன்றி மறையும்
காலத்துகிடையே
வளர்ந்து தேய்ந்து வளரும் நீ
என்னுடன் ஒட்டிப் பிறந்த
என் இரட்டைப் பிறவியே....
- பிரதீபா புதுச்சேரி (bradipagen@yahoo.co.in)
#நன்றி
வார்ப்பு இணைய இதழ்(http://www.vaarppu.com/view/1793/)
இருவழிப் பாதை
இன்றய இருவழிப்
பாதையை தான்
அன்றே அனில் மீது
எங்கள் ராமன்
வரைந்தானோ!....
- பிரதீபா புதுச்சேரி (bradipagen@yahoo.co.in)
#நன்றி
வார்ப்பு இணைய இதழ்(http://www.vaarppu.com/view/1749/)
முதியோர்
கடந்து வந்த
நாட்களை
காலம் முகத்தில்
அச்சிடக்
காணவேண்டியவை எல்லாம்
தேடித்தேடிக் கண்ட
களைப்பில் பார்வை குன்ற
ஒடியோடி உழைத்து
உடலும் சோர்வு
அடைய
கம்பீரமாக எதிர்நோக்கிய
வாழ்கையை எண்ணங்கள்
அசைபோட
கால மாற்றங்களுக்கு
சாட்சியாய்
காலம் கற்றுத்தந்த
பாடங்களுக்கு பதிவேடாய்
நம் அனைவரின் இல்லங்களிலும்
ஓரமாய் தள்ளாடும்
அனுபவ அந்தாதி
படிக்கப்படாமலே...
- பிரதீபா புதுச்சேரி (bradipagen@yahoo.co.in)
#நன்றி
பதிவுகள் இணைய இதழ்(http://www.geotamil.com/pathivukal/poems_january2010.htm)
முத்துக்கமலம் இணைய இதழ்( http://www.muthukamalam.com/muthukamalam_kavithai378.htm)
வார்ப்பு இணைய இதழ்(http://www.vaarppu.com/view/2037/)
Subscribe to:
Posts (Atom)






